1 Corinthians 7

Vele'mo maige a'mo alige hisaya kavafe'mo hu'niya gemae

1Hemenimo avo'mo kaeta nafi ge'naya kavafe'mo lapa paigesuve. Vemogimo a'mo o'ali'a afa maisaya kava'mo kanale kava'mo hane'niye. 2Hane'niya'monanafa kumai kava'mo lusi kava huno afole ne'aiya'mofe'mo muki magoke magoke vemogimo apakai'api a'apige'mo alisage'a muki magoke magoke a'nemogimo apakai'api anau'apimogiteke'mo maisage'a hisaya kava'mo hane'niye. 3Vemogimo apakufamo a'ne'apimo apamisayafe'mo ka o'akani'a afa'a apamisaya kava'mo hane'niye. Ani kava hu'a a'nemogimo apakufamo anau'apimogi apamisayafe'mo ka o'akani'a afa'a apamisaya kava'mo hane'niye. 4A'nemogimo apakai'api apakufale'mo yagai'a o'apategafa anau'apimogige'mo yagai'a apategae. Ani kava hu'a vemogimo apakai'api apakufale'mo yagai'a o'apategafa a'ne'apimogige'mo yagai'a apategae. 5Mago yalavela'moganimo magoke agufa gemo hu'anae'mo, la'aote la'aote huta'a mai'neta'a ne'ya'mo o'neta'a mosi'neta'ae'mo nunumu'mo hugu'ae, hu'ana husa'ana aise afina'mo anaote anaote hu'ana havae'ne'anae'mo nunumu hute'anae'mo halate magokepi lokae'ana havaega'ae. Lapakufale'mo alagepa hutapa yagaitapa olapatesageno Satani'a humi lapateteno lapayate'mo aligiyanagi magokepi'mo lokaetapa havaeyo. 6Vele'mo maiyo, hu'na huge a'mo aliyo, hu'na huge nehuva gemo ke'aepa gemo nosuva'monanafa ani kava'mo afa'a hugae, hu'na nehuve. 7Nagaemo mai'nova kava hu'a muki vaya'mo maisayafe'mo nahau'niye. Nahau'niya'monanafa Goti'a alu kava alu kava'mo hu'a maisaya agufa lokiya'amo alino magoke magoke vaya'mo fiku apamite apamite huno apami'niye.

8Nagaemo vele'mo o'mai'naya a'nemogitapaenagi a'mo o'ali'naya vemogitapaenagi kogu a'ne'aifenagi hu'na hemenimo lapa pai'nae'mo, ne'mauva kava hutapa lapaote lapaote hutapa maisaya kava'mo kanale kava'mo hane'niye, hu'na lapa nepauve. 9Lapa nepauva'monanafa lapakufale'mo afa'a yagaitapa olapatesayana vele'mo maige a'mo alige hutapa maiyo fiku yanageno lapa'ye hugiyanagi.

10Nagaemo vele'mo mai'naya a'ne anaga'mogitapa'e a'mo ali'naya ve anaga'mogitapa'efe'mo lapa pai'nae'mo, A'nemogitapae, hu'na, anautapimogimo apataletapa o'viyo. 11A'nemogimo anau'apimogimo apatale'a visayana u'a alu vele'mo o'mai'a afa'a maiyo. Afa'a maisayafe'mo ohapau'nisiyana halate e'a anau'apimogi'e'mo magokepi lokae'a maiyo. Anau'apimogitapae, hu'na, a'netapimo hapa faitapa o'apataleyo. Nagai'nimo mani gemo nosuva'monanafa Ala kava ne'mo'a hu male'niye.

12Nagaemo hapa opai'nova vaya'aife'mo hapa paigesuve. Ala kava ne'mo'a hiyo, huno osu'nifa nagai'nimo lapa pai'nae'mo, Mago konagatimo'a a'amo'mo agesa afino fatago osu'nisiyana a'a'e'mo magokepi lokae'ana maisa'afe'mo hau'nisiya'mo'mo ha faino o'atalesiya kava'mo hane'niye. 13Mago a kanomo'a anau'amo'mo agesa afino fatago osu'nisiyana anau'amo'e'mo magokepi lokae'ana maisa'afe'mo hau'nisiya'mo'mo ataleno o'visiya kava'mo hane'niye. 14Apakesa afi'a fatago nehaya a'nemogimo apakesa afi'a fatago osu'naya anau'apimogi Goti'a hapa maesiyafe'mo ma mopafi vayapati'mo apavale'a apaote apate'nage'a mai'nae. Ani kava hu'a apakesa afi'a fatago nehaya anau'apimogimo apakesa afi'a fatago osu'naya a'ne'apimo Goti'a hapa maesiyafe'mo apavale'a apaote apate'nage'a mai'nae. Apavale'a apaote o'apate'naesinana mafa'netapimo malaga mafa'negana hu'a mai'naesina'monanafa mafa'netapimo apaote mafa'nemo mai'nae.

15Mai'naya'monanafa apakesa afi'a fatago osu'naya vaya'mogimo, lapataleta uta laote'mo maigesune, hu'a hisayana afa'a u'a maigae. Visage'apae'mo apakesa afi'a fatago nehaya ve a'nemogimo kalavusifi'mo o'maigaya'monanafa Goti'a alagepa huta magokepi lokaeta maisunafe'mo keya aeno ge hu'niye. 16A'nemogitapae, hu'na, lapakaemo, anautimogi'e'mo magokepi lokaeta maisunana apakufamo alita katita apatesupi, hutapa lapakesamo afiyo. Anau'apimogitapae, hu'na, lapakaemo a'neti'e'mo magokepi lokaeta maisunana apakufamo alita katita apatesupi, hutapa lapakesamo afiyo.

17Ala kava ne'mo'a alu kava alu kava'mo hutapa maisayafe'mo lokiya'amo lapamete lapamete huno alino lapami'niyanagi ani kava hutapa maiyo. Goti'a lapakaefe'mo keya aeno ge hu'niya afina'mo haiya kava huta mai'nopi hutapa lapakesamo ne'afitapae'mo ani kava hutapa maiyo. Mani ke'aepa gemo muki siosi'ale siosi'ale'mo mai'naya vaya'aife'mo ali'na apaya ne'malove. 18Goti'a keya aeno ge hu'niya afina'mo Yu vaya'mogitapa lapakufamo ago lagau'a atale'nisayana halate apakufamo lagau'a o'atale'naya vayakana hutapa o'maiyo. Goti'a keya aeno ge hu'niya afina'mo lapakufamo lagau'a o'atale'nisayana lapakufamo olagaiyo. 19Lagufamo lagau'a atale'nisafi lagau'a o'atale'nisafi afa'a ina agufa kava'mo hane'niye. Hogote kava'mo hane'niyana Goti ke'aepa ge'amo akame nehuna kava'mo hane'niye. 20Goti'a keya aeno ge hu'nigetapa eta mai'naya kava hutapa maiyo. 21Goti'a keya aeno ge hu'nigetapae'mo afa vaya'mo mai'netapa afa ali'ya'mo ali'naya vaya'mo mai'nafiye. Kanalene, hutetapa lapausoli osiyo. Osugaya'monanafa hatu maeno lapatesigetapa afa'a maisaya ka'mo hane'nisiyana ani kate'mo ne'utapae'mo nofitapimo hatu maetapa ataletapa afa'a maiyo. 22Ala kava ne'mo kalavusifi'mo mai'ne'a ali'ya'mo ne'aliya vaya'aife'mo keya aeno ge huteno apakupi mafa'nemo hatu maeno apate'nige'a Ala kava ne'mo afa vaya'amo ne'maiye. Kalaisi'a afa'a mai'naya vaya'aife'mo keya aeno ge huteno nofi aeno apate'nige'a nofite'mo mai'ne'a ali'ya'amo ne'aliya vaya'mo mai'nae. 23Muki'amogitapae, hu'na, Kalaisi'a alopa miyateti'mo ago miya fai'niyanagi ma mopafi vaya'ai kalavusifi'mo lapakupi mafa'nemo o'maino. 24Konaga'nimogitapae, hu'na, Goti'a keya aeno ge hu'nigetapa eta mai'naya kava hutapa Goti'e'mo magokepi'mo lokaeta maime maime viyo.

A'mo o'alige vele'mo o'maige hu'naya vaya'aife'mo hu'niya gemae

25A'mo o'alige vele'mo o'maige hu'naya kavafe'mo ge hutapa nafi ge'nae. Vele'mo o'maige a'mo o'alige hu'naya vaya'aife'mo Ala kava netegati'mo mani ke'aepa gemo o'ali'nova'monanafa Goti'a hau huno nate'niya kavateti'mo lama gemo nehuva vekamo mai'ne'nae'mo nagesamo afite'nae'mo lapa nepauve. 26Hemenimo kana alisuna afina'mo afole aisiyafe'mo nehiya'mofe'mo nagesamo afi'nae'mo, haiya kava hutapa mai'nisafi ani kavake'mo hutapa maiyo. 27Vele'mo mai'nisayana apataletapa o'viyo. A'mo ali'nisayana hapa faitapa o'apataleyo. A'mo o'ali'nisayana a'mo o'alitapa afa'a maiyo. 28Mani gemo huva'monanafa a'mo alisayana hosu kava'mo afa'a osugae. Mago ve'e'mo magokepi lokae'a ohavae'nisaya a'mafa'nemogimo vele'mo maisayana hosu kava'mo osugae. Vele'mo maige a'mo alige hu'a mai'nisaya vaya'mogi ma mopafi mai'ne'apae'mo hanageke ya'mo aligae. Faitapa kasalo paesayafe'mo nahau'nige'nae'mo mani gemo lapa nepauve.

29Konaga'nimogitapae, hu'na, Ge'nimo aepa'amo hane'niyana kanatimo aupa afina'mo hane'niye. Hemeni afinateti'mo a'mo ali'nisaya vaya'mogimo a'apie'mo apakesa ala'amo o'afi'a a'mo o'ali'naya vayakana hu'a maime maime visaya kava'mo hane'niye. 30Ma mopafi kavafe'mo yulagefa ne'aisaya vaya'mogimo yulagefa no'aiya vayakana hu'a maime maime visaya kava'mo hane'niye. Ma mopafi kavafe'mo apamogaga ne'aisaya vaya'mogimo apamogaga no'aiya vayakana hu'a maisaya kava'mo hane'niye. Miya fai'a ali'nisaya vaya'mogimo miya fai'a o'ali'naya vayakana hu'a maisaya kava'mo hane'niye. 31Ma mopafi kagemi yatefe'mo ali'ya ne'alisaya vaya'mogimo ma mopafi yafeke'mo apakesamo afite'a atafau'a alagi hu'a o'maisaya kava'mo hane'niye. Ma mopa'e ma mopafi kava'e'mo alagi ago hano husiyafe'mo hogo nehiye.

32Lapausoli osutapa afa'a maisayafe'mo nahau'niye. A'mo o'ali'naya vaya'mogimo Ala kava ne'mo ali'ya'alefe'mo, Ala kava ne'mo'a amuse huno latesiyafe'mo na kava hugune, hu'a apakesamo ne'afiye. 33Ne'afiya'monanafa a'mo ali'naya vaya'mogimo a'ne'apimogimo amuse hu'a apatesayafe'mo hapau'nige'apae'mo ma mopafi yafeke'mo apakesamo ne'afiye. 34Ani kava hu'a mai'ne'apae'mo lole apakesamo ne'afiye. Vele'mo o'mai'naya a'mafa'nemogimo Ala kava ne'mo ali'ya'alefe'mo apakesamo ne'afiye. Apakaemo apakufa'e apaune'apame'e'mo amite'a agaetefe'mo e'a apaote maisayafe'mo hapau'niya'monanafa vele'mo mai'naya a'nemogimo ma mopafi kavafeke'mo apakesamo afite'apae'mo anau'apimogi amuse hu'a apatesayafe'mo na kava hugune, hu'a apakesamo ne'afiye. 35Mani gemo hu'na lapatafau'na lapatesuvafe'mo nosufa lapa maesuvafeke'mo nehuve. Lapakaemo Ala kava ne'mo ali'ya'alefe'mo lole lapakesamo o'afitapa atafautapa alagi hisayafeke'mo nahau'niye.

36Afo'apimogitapae, hu'na, a'mafa'netapimo kosite'apae'mo vele'mo u'na maigesuve, hu'a nehisagetapae'mo ha'ao, hu'na hisuvana agaetegamo hosu gemo huguve, hutapa hisayana hapau'nisiya kava'mo afa'a hugae. Kanalenageno vele'mo uno maisiya kava'mo hosu kava'mo ohane'niye. 37Ohane'niya'monanafa mago'amogitapamo lokiya lapakesamo afitapae'mo, vele'mo u'a o'maigae, hutapa hisage'apae'mo a'mafa'netapimogi vele'mo maigesuve, hu'a osisagetapa apavaletapa o'apamisayana kanale kava'mo hane'niye. 38Afo'apimogimo apavale'a apamisaya kava'mo kanale kava'mo hane'niya'monanafa Afo'apimogimo apavale'a o'apamisaya kava'mo'a aeno agase'niya kava'mo hane'niye.

39Inagi mago a kanomo'mo anau'amo'mo ofalino afa'a mai'niya afina'mo atafauno alagi huno mai'niye. Anau'amo'mo falisigeno'ae'mo hatu maeno atesigeno uno hau'nisiya vele'mo afa'a maigiya'monanafa Kalisitini vekaleke'mo maino. 40Vele'mo uno maigiya'monanafa vele'mo uno o'maino afa'a maisiyana mago'e huno amogaga aigiye, hu'na nagesamo ne'afuve. Nagae'e'mo Goti Auneme'amo ali'nove, hu'na nagesamo ne'afuve.